அனைத்து மலேசிய வாழ் இந்துப் பெருமக்களுக்கும் எமது அன்பான வணக்கம்!
தற்போது மலேசியாவில் நிலவி வரும் கடுமையான புகைமூட்டத்திற்கு மத்தியில், நாம் அனைவரும் பக்திச் சிறப்போடு நவராத்திரி திருவிழாவைக் கொண்டாட ஆயத்தமாகி வருகிறோம். அன்னை பராசக்தியைப் போற்றி வழிபடும் இந்த நவராத்திரிப் பெருவிழா நமது ஆன்மீக வாழ்க்கையில் மிகவும் புனிதமானது மற்றும் முக்கியமானது என்பதில் ஐயமில்லை. இருப்பினும், இந்தச் சூழலில் நமது ஆரோக்கியத்தைப் பாதுகாப்பது மிக மிக முக்கியமானது என்பதை அனைவருக்கும் நினைவூட்ட விரும்புகிறேன்.
“சுவர் இருந்தால் தான் சித்திரம் வரைய முடியும்” என்ற பழமொழிக்கு ஏற்ப, ஆரோக்கியமான உடலும் மனமும் இருந்தால் மட்டுமே நம்மால் ஆன்மீகக் கடமைகளை முழுமையாக நிறைவேற்ற முடியும். எனவே, பக்தியோடு சேர்த்து ஆரோக்கியத்திற்கும் முதன்மை முக்கியத்துவம் தருமாறு அன்புடன் கேட்டுக்கொள்கிறேன்.
பொதுமக்களுக்கான ஆரோக்கிய வழிகாட்டுதல்கள்:
•முகக்கவசம் அணிதல்: அவசியமான தேவைகளுக்காக வெளியே செல்லும்போதும், கோயில்களுக்குச் செல்லும்போதும் தரமான முகக்கவசங்களை தவறாமல் அணியுங்கள்.
•போதிய நீர் அருந்துதல்: உடலை எப்போதும் சீரான நீர்ச்சத்துடன் வைத்துக்கொள்ள அதிகளவு நீர் அருந்துங்கள்.
•வெளிப்புற நடவடிக்கைகளைக் குறைத்தல்: முதியவர்கள், சிறுவர்கள், கர்ப்பிணிப் பெண்கள் மற்றும் சுவாசப் பிரச்சனை உள்ளவர்கள் முடிந்தவரையில் வெளிப்புற நடவடிக்கைகளைத் தவிர்த்து, வீட்டிற்குள்ளேயே பாதுகாப்பாக இருக்கவும்.
•உடனடி மருத்துவ உதவி: மூச்சுத்திணறல், இருமல் அல்லது கண் எரிச்சல் போன்ற அறிகுறிகள் தென்பட்டால் உடனடியாக மருத்துவரை அணுகவும்.
கோயில் நிர்வாகத்தினருக்குத் தேவைப்படும் முன்னெச்சரிக்கை நடவடிக்கைகள்:
நவராத்திரி காலத்தில் கோயில்களில் பக்தர்கள் பெருமளவில் திரள்வார்கள் என்பதால், கோயில் நிர்வாகத்தினர் பின்வரும் ஏற்பாடுகளைச் செய்யுமாறு கேட்டுக்கொள்ளப்படுகிறார்கள்:
•வெளிப்புற நிகழ்வுகளைக் குறைத்தல்: கோயிலின் வெளிப்புறத்தில் நடைபெறும் கலை நிகழ்ச்சிகள், ஊர்வலங்கள் மற்றும் நீண்ட நேரப் பிரார்த்தனைகளைக் குறைத்து, காற்றோட்ட வசதி கொண்ட உள் மண்டபங்களில் நிகழ்ச்சிகளை நடத்த ஏற்பாடு செய்யவும்.
•பக்தர்களுக்கான பாதுகாப்பு வசதிகள்: கோயிலுக்கு வரும் பக்தர்களின் வசதிக்காகப் போதிய அளவு குடிநீர் மற்றும் முதலுதவி வசதிகளைத் தயார் நிலையில் வைத்திருக்கவும்.
•உதவிக் குழுக்கள்: வயதானவர்களுக்கும், உடலநலக் குறைவு ஏற்படும் பக்தர்களுக்கும் உடனடியாக உதவத் தன்னார்வலர்களைப் பணியில் அமர்த்தவும்.
நவராத்திரி திருவிழா நமக்கு ஆன்மீக அமைதியையும் அருள்வளத்தையும் தரக்கூடியது. அதே வேளையில், தகுந்த சுகாதார முன்னெச்சரிக்கை நடவடிக்கைகளைப் பின்பற்றி, நம் குடும்பத்தினரையும் சமூகத்தையும் பாதுகாப்பாக வைத்திருப்பது நமது கடமையாகும்.
அன்னை பராசக்தியின் அருளால் அனைவரும் நோய்நொடியற்ற ஆரோக்கியத்துடனும், பாதுகாப்புடனும் இந்த நவராத்திரியைக் கொண்டாடி மகிழ பிரார்த்திக்கிறேன்.
