செலாங்கூரில் கடந்த ஐந்து ஆண்டுகளாக வன்முறை குற்றங்கள் மற்றும் போதைப்பொருள் தொடர்பான சட்டவிரோத நடவடிக்கைகளில் ஈடுபட்டு வந்ததாகக் கூறப்படும் Geng TR குற்றக் கும்பலின் முக்கிய உறுப்பினர் ஒருவரை புக்கிட் அமான் போலீசார் கைது செய்துள்ளனர்.
புக்கிட் அமான் குற்றப் புலனாய்வுத் துறை இயக்குநர் டத்தோ எம். குமார் கூறுகையில், கைது செய்யப்பட்ட 46 வயதுடைய நபருக்கு கொலை, ஆயுதங்களுடன் கூட்டுக் கொள்ளை மற்றும் ஆபத்தான ஆயுதங்களால் காயப்படுத்துதல் உள்ளிட்ட பல்வேறு கடுமையான குற்றப் பதிவுகள் உள்ளதாக தெரிவித்தார்.
இந்த கைது நடவடிக்கை இந்தியா மற்றும் தாய்லாந்து அதிகாரிகளின் ஒத்துழைப்புடன் மேற்கொள்ளப்பட்டது. சென்னை, இந்தியாவிலிருந்து பாங்காக், தாய்லாந்து நோக்கி பயணம் செய்துகொண்டிருந்த விமானத்தில் சந்தேக நபர் கைது செய்யப்பட்டதாகவும், பின்னர் அவர் மலேசியாவிற்கு அழைத்து வரப்பட்டதாகவும் கூறப்பட்டது.
கடந்த மே 7ஆம் தேதி இன்டர்போல் சிவப்பு அறிவிப்பு (Red Notice) அவருக்கு எதிராக வெளியிடப்பட்டிருந்தது. அதேவேளை, ஏப்ரல் 17ஆம் தேதி கோலா சிலாங்கூர் நீதிமன்றமும் அவரது கைது வாரண்டை பிறப்பித்திருந்தது. அமைப்புசார் குற்றக் கும்பலில் உறுப்பினராக இருந்ததாகும் குற்றச்சாட்டின் பேரில் அவர் நாளை ஷா ஆலாம் செஷன்ஸ் நீதிமன்றத்தில் குற்றம் சாட்டப்படவுள்ளார்.
குற்றவியல் சட்டத்தின் பிரிவு 130V(1)-இன் கீழ் பதிவு செய்யப்பட்டுள்ள இந்தக் குற்றம் நிரூபிக்கப்பட்டால், ஐந்து ஆண்டுகள் முதல் 20 ஆண்டுகள் வரை சிறைத்தண்டனை விதிக்கப்படலாம். 2019 முதல் செயல்பட்டு வரும் Geng TR கூட்டணி, Geng 08, Geng 18, Geng 21, Geng 24 மற்றும் Geng 36 ஆகிய கும்பல்களை உள்ளடக்கியதாக போலீசார் தெரிவித்துள்ளனர். இந்தக் கும்பல் போதைப்பொருள் கடத்தல், மிரட்டிப் பணம் பறித்தல், கொலை, தீவைப்பு உள்ளிட்ட பல்வேறு வன்முறை குற்றங்களில் ஈடுபட்டதாக நம்பப்படுகிறது.
