ஜொகூர் பாரு அக 6
தம்மைப் பொறுத்தவரை ருக்குன் நெகாரா என்பது அதிகாரப்பூர்வ நிகழ்ச்சிகளில் வாசிக்கப்படும் ஐந்து கொள்கைகள் மட்டுமல்ல. மலேசியர்களாக நாம் இவ்வாறு வாழ வேண்டும் என்பதற்கான வழிகாட்டியாகும். ஒருவரையொருவர் மதிப்பது, வேறுபாடுகளை புரிந்து கொள்வது மற்றும் ஒன்றிணைந்து நல்லிணக்கத்தை பாதுகாப்பது ஆகியவை அதன் அடிப்படையாகும் என தேசிய ஒருமைப்பாட்டு துறை துணை அமைச்சர் யுனேஸ்வரன் ராமராஜ் கூறினார்.
மலேசியாவின் பலம் அனைவரும் ஒரே மாதிரியாக இருப்பதில் இல்லை. மாறாக, பல்வேறு இனங்கள், மதங்கள் மற்றும் கலாசாரங்களைச் சேர்ந்த மக்கள் ஒன்றாக வாழ்ந்து, கற்று, முன்னேறுவதில்தான் உள்ளது.
அதனால்தான் இளைஞர்கள் ஒற்றுமையின் தூதர்களாக இருக்க வேண்டும் என்று நான் விரும்புகிறேன். இன வேறுபாடுகளைக் கடந்து நட்பை வளர்த்துக் கொள்ளுங்கள். பிறரின் கலாசாரங்களை அறிந்துகொள்ளுங்கள். வேறுபாடுகள் நமக்கிடையே தடையாக மாற அனுமதிக்காதீர்கள்.
மாணவர்கள் மற்றும் கல்வியாளர்களிடமும் ‘புல்லியிங்’ எனப்படும் கொடுமைப்படுத்தும் கலாசாரத்தைத் தடுக்க ஒன்றிணைந்து செயல்படுமாறு வலியுறுத்தினேன். அது உடல் ரீதியாகவோ, வார்த்தைகள் மூலமாகவோ அல்லது சமூக ஊடகங்கள் வழியாகவோ இருந்தாலும், யாரும் அவமதிக்கப்படவோ, ஒதுக்கப்படவோ அல்லது காயப்படுத்தப்படவோ கூடாது. கல்வி நிறுவனங்கள் பாதுகாப்பான மற்றும் பரஸ்பர மரியாதை கொண்ட இடங்களாக இருக்க வேண்டும்.
டிஜிட்டல் உலகிலும், இன மற்றும் மத உணர்வுகளைத் தூண்டும் உள்ளடக்கங்களால் எளிதில் பாதிக்கப்பட வேண்டாம். சமூக ஊடகங்களைப் பயன்படுத்தி நமக்கிடையே பாலங்களை உருவாக்குங்கள்; இடைவெளிகளை அதிகரிக்காதீர்கள்.
IPNas 2025 அறிக்கையின்படி, தேசிய ஒற்றுமைக்கான மதிப்பெண் 0.701 ஆகப் பதிவாகியுள்ளது. ஜொகூர் மாநிலமும் இதே 0.701 மதிப்பெண்ணைப் பெற்றுள்ளது. இருப்பினும், ஒற்றுமையை ஒருபோதும் அலட்சியமாக எடுத்துக்கொள்ள முடியாது. அது ஒவ்வொரு நாளும் தொடர்ந்து வளர்க்கப்பட வேண்டிய ஒன்றாகும்.
‘மலாம்ப் கெபுடாயான்’ (கலாசார இரவு) நிகழ்ச்சியில் பங்கேற்பாளர்கள் வெளிப்படுத்திய உற்சாகத்தைக் காணவும் மகிழ்ச்சியடைந்தேன். அவர்களின் பங்களிப்பைப் பாராட்டும் வகையில், கலந்து கொண்ட ஒவ்வொரு குழுவுக்கும் RM500 ரொக்கப் பங்களிப்பாக வழங்கினேன்.
ஜொகூர் மாநில JPNIN, கோலேஜ் கொமுனிட்டி செகாமாட் 2, பயிற்றுநர்கள், ஏற்பாட்டுக் குழுவினர், மூலோபாயப் பங்காளிகள் மற்றும் அனைத்து பங்கேற்பாளர்களுக்கும் எனது நன்றியைத் தெரிவித்துக்கொள்கிறேன்.
இந்தத் திட்டத்திலிருந்து வெறும் நினைவுகளை மட்டும் எடுத்துச் செல்லாமல், நீங்கள் எங்கு இருந்தாலும் ஒற்றுமையின் தூதர்களாக செயல்பட வேண்டும் என்ற உறுதியுடனும் திரும்பிச் செல்லுங்கள்.
ஒற்றுமை என்பது ஒரு தரப்பின் பொறுப்பு மட்டுமல்ல. அது நம் அனைவரின் பொறுப்பு என்றார் அவர்.
