சுபாங், செப் 14
மலேசியாவின் முக்கிய விமான நிலையங்களிலிருந்து தனது சர்வதேச விமானச் சேவைகளை விரிவுபடுத்தும் வகையில், Batik Air இந்தோனேசியாவுக்கு இரண்டு புதிய விமானப் பாதைகளை அறிமுகப்படுத்துகிறது.
இதன்படி, சுபாங் – பாலி மற்றும் பினாங்கு – பாதாம் (Batam) ஆகிய புதிய விமானச் சேவைகள் தொடங்கப்பட உள்ளன. மலேசியா மற்றும் இந்தோனேசியா இடையிலான தொடர்ந்து அதிகரித்து வரும் பயணத் தேவையைப் பூர்த்தி செய்வதுடன், மலேசியாவின் முக்கிய விமானப் போக்குவரத்து மையங்களில் Batik Air-ன் இருப்பையும் இந்த விரிவாக்கம் வலுப்படுத்தும்.
இரு நாடுகளுக்கும் இடையிலான பயணிகள் போக்குவரத்து தொடர்ந்து வலுவான வளர்ச்சியைப் பதிவு செய்து வருகிறது. 2025ஆம் ஆண்டில் இந்தோனேசியாவிலிருந்து 4.3 மில்லியன் சுற்றுலாப் பயணிகளை மலேசியா வரவேற்றது. இது முந்தைய ஆண்டை விட 2.9% அதிகமாகும் . இதன் மூலம் இந்தோனேசியா மலேசியாவின் முக்கியமான சர்வதேச சுற்றுலா சந்தைகளில் ஒன்றாகத் திகழ்கிறது.
அதே நேரத்தில், மலேசியாவும் இந்தோனேசியாவுக்கான முக்கியமான சர்வதேச சுற்றுலா சந்தையாகத் தொடர்ந்து விளங்குகிறது. குறிப்பாக பாதாம் மற்றும் பாலி போன்ற பிரபலமான இடங்களுக்கு மலேசியாவிலிருந்து கணிசமான எண்ணிக்கையிலான பயணிகள் செல்கின்றனர்.
சுற்றுலா மற்றும் வர்த்தகப் பயணங்களைத் தவிர, மருத்துவச் சேவைகளைப் பெறுவதற்காகவும் இந்தோனேசியர்கள் மலேசியாவுக்கு தொடர்ந்து வருகை தருகின்றனர். மலேசியாவில் உள்ள மேம்பட்ட மருத்துவ வசதிகள் மற்றும் சிறப்பு மருத்துவச் சேவைகள், இரு நாடுகளுக்கும் இடையிலான பயணத் தேவையை அதிகரிக்கும் காரணிகளில் ஒன்றாக உள்ளன.
மேம்படுத்தப்பட்ட விமான இணைப்புகள், மருத்துவ சிகிச்சை, உடல்நலப் பரிசோதனை மற்றும் அதனுடன் தொடர்புடைய சேவைகளுக்காக மலேசியா வரும் இந்தோனேசியர்களுக்கு அதிக வசதியை வழங்கும்.
சுபாங் – பாலி புதிய சேவை
20 அக்டோபர் 2026 முதல் தொடங்கும் புதிய சுபாங்–பாலி விமானச் சேவை, சுல்தான் அப்துல் அசிஸ் ஷா விமான நிலையம் (சுபாங்) மற்றும் பாலி இடையே நேரடி விமான இணைப்பை வழங்கும்.
இதன் மூலம் கிள்ளான் பள்ளத்தாக்கு மற்றும் அதைச் சுற்றியுள்ள பகுதிகளில் வசிப்பவர்கள், இந்தோனேசியாவின் பிரபலமான சுற்றுலாத் தலமான பாலியை மேலும் எளிதாகவும் வசதியாகவும் சென்றடைய முடியும்.
2025ஆம் ஆண்டில் பாலிக்கு 6.95 மில்லியன் சர்வதேச சுற்றுலாப் பயணிகள் நேரடியாக வந்துள்ளனர். இது 2024ஆம் ஆண்டுடன் ஒப்பிடுகையில் 9.72% அதிகரிப்பாகும்.
இந்த வலுவான வளர்ச்சி, பிராந்தியத்தின் முக்கியமான சுற்றுலாத் தலமாக பாலி தொடர்ந்து பெரும் வரவேற்பைப் பெற்று வருவதை எடுத்துக்காட்டுகிறது.
