தேசிய உணர்வால் ஒன்றிணையும் நெஞ்சங்கள்! செந்தூலில் ‘ஜாலூர் கெமிலாங்’ வழங்கி தேசியப்பற்றை மிளிரச் செய்த டத்தோ சைமன் சுரேஷ்.

கோலாலம்பூர், ஆகஸ்ட் 22-
சுதந்திர தினக் கொண்டாட்டங்கள் நன்னாளை எட்டியுள்ள வேளையில், நாட்டின் தேசிய ஒற்றுமையையும் ஆழமான தேசப்பற்றையும் புதிய வீச்சோடு வலுப்படுத்தும் நோக்கில், வாவாசான் நெகாரா கட்சியின் உச்சமன்ற உறுப்பினர் டத்தோ சைமன் சுரேஷ் செந்தூல் சந்தைப் பகுதி மக்களிடையே தேசியக் கொடிகளை வழங்கி தேச உணர்வை மிளிரச் செய்துள்ளார்.

வரவிருக்கும் சுதந்திர தினத்தை முன்னிட்டு முன்னெடுக்கப்பட்ட இந்த நெகிழ்ச்சியான நிகழ்வில், செந்தூல் பசார் வியாபாரிகள், பாதசாரிகள் மற்றும் வாகன ஓட்டிகளுக்கு ஜாலூர் கெமிலாங் கொடிகள் உற்சாகமாக வழங்கப்பட்டன.

பொதுமக்கள் தங்களின் இல்லங்களிலும், வணிக வளாகங்களிலும், வாகனங்களிலும் நமது தேசியக் கொடியை பெருமையோடு பறக்கவிட்டு, நாட்டின் மீதான அளப்பரிய அன்பை வெளிப்படுத்த வேண்டும் என்பதே இந்நிகழ்வின் பிரதான நோக்கமாகும்.

இந்நிகழ்வின் போது ஊடகங்களிடம் பேசிய டத்தோ சைமன் சுரேஷ், “தேசப்பற்று என்பது ஒரு குறிப்பிட்ட தரப்பினருக்கோ அல்லது அமைப்பிற்கோ மட்டும் உரித்தான கடமை அல்ல. அது இனம், மதம், பின்னணி ஆகிய அனைத்து எல்லைகளையும் கடந்து, மலேசியர் ஒவ்வொருவரையும் ஒரே குடையின் கீழ் பிணைக்கும் உன்னதமான உணர்வு.

ஜாலூர் கெமிலாங் என்பது வெறும் துணி அல்ல; அது நமது அடையாளம், கௌரவம், ஒற்றுமை மற்றும் இந்த நாட்டின் மீது நாம் கொண்டுள்ள ஆழமான பற்றின் பிரதியை வெளிப்படுத்தும் தாரக மந்திரம். நாட்டின் அமைதியையும் நற்புறவையும் கட்டிக்காப்பது நம் ஒவ்வொருவரின் தலையாய பொறுப்பாகும்” என ஆணித்தரமாகக் குறிப்பிட்டார்.

அத்துடன், குளிரூட்டப்பட்ட அறைகளில் இருந்து செயல்படாமல், நேரடியாக மக்களிடம் சென்று களத்தில் இறங்கி உரையாடுவதே உண்மையான மக்கள் சேவை என்றும், அதன் மூலமே அடித்தட்டு மக்களின் அன்றாடப் பிரச்சினைகளையும் கருத்துகளையும் நேரில் கேட்டறிய முடியும் என்றும் அவர் சுட்டிக்காட்டினார்.

வாவாசான் நெகாரா முன்னெடுக்கும் முதன்மைக் கொள்கைகளுக்கு ஏற்ப, மக்களின் நலனும், தேசிய ஒற்றுமையும், மலேசியாவின் ஒளிமயமான எதிர்காலமுமே எப்போதும் தங்களின் முதல் முன்னுரிமையாக இருக்கும் என்றும் அவர் உறுதியளித்தார்.

“மலேசியாவின் உண்மையான பலமே இங்குள்ள மக்களிடம்தான் அடங்கியிருக்கிறது. நாம் வெவ்வேறு கலாசாரங்கள், மொழிகள், பழக்கவழக்கங்களைக் கொண்டிருக்கலாம்; ஆனால் நமது தேசிய அடையாளம் ஒன்றே ஒன்றுதான்.. நாம் அனைவரும் மலேசியர்கள்! சமூகத்தின் மத்தியிலிருந்தே பரஸ்பர மரியாதையும் ஒத்துழைப்பும் மலர வேண்டும். நாம் அனைவரும் ஒன்றுபட்டால் மட்டுமே, என்றும் நிலைத்துநிற்கும் வலிமையான மலேசியாவை உருவாக்க முடியும்,” என்று அவர் உணர்ச்சிப்பூர்வமாகத் தெரிவித்தார்.

நெகிழ்ச்சியூட்டிய மக்களின் குரல்கள்:

செந்தூல் சந்தையில் நடைபெற்ற இந்த தேசியக் கொடி விநியோகத்தில், அங்குள்ள சிறு வியாபாரிகளும் பொதுமக்களும் மிகுந்த ஆர்வத்துடன் பங்கேற்று கொடிகளைப் பெற்றுக்கொண்டனர்.

நீண்டகாலமாகச் சிறிய அளவில் வியாபாரம் செய்துவரும் மூதாட்டி ஒருவர் தனது நினைவுகளைப் பகிர்ந்து கொள்கையில், “இந்தக் கொடியைக் கையில் ஏந்தும்போதே, பழைய சுதந்திர தின நினைவலைகள் என் கண்முன்னே நிழலாடுகின்றன. சுதந்திர தினம் என்பது மலேசியர்கள் அனைவரும் ஒன்றாகக் கொண்டாடும் ஒரு பொன்னான நாள். நேரடியாக எங்களைத் தேடி வந்து கொடியை வழங்கி, அந்த பழைய நினைவுகளை மீட்டுத்தந்ததற்கு மனமார்ந்த நன்றிகள்” என நெகிழ்ச்சியுடன் குறிப்பிட்டார்.

அதேபோல், அப்பகுதியில் மளிகைக் கடை நடத்திவரும் சீன வியாபாரி ஒருவர் கூறுகையில், “மலாய்க்காரர்கள், சீனர்கள், இந்தியர்கள் மற்றும் பல இனத்தவர்கள் அனைவரும் சகோதரத்துவத்துடன் இணைந்து வாழ்வதே இந்த மலேசியத் திருநாட்டின் ஒப்பற்ற அடையாளம். இந்த அடையாளத்தைப் பாதுகாப்பது மிக முக்கியம். இன்று வழங்கப்பட்ட இந்த ஜாலூர் கெமிலாங், நம்மிடையே உள்ள அந்தப் பிணைப்பை தொடர்ந்து வலுப்படுத்தும் என்பதில் எள்ளளவும் சந்தேகமில்லை” எனப் பெருமிதத்துடன் தெரிவித்தார்.

சமூகத்தின் அனைத்துத் தரப்பு மக்களையும் ஒன்றிணைத்து, தேசிய தின உணர்வை பட்டிதொட்டியெங்கும் கொண்டு சேர்க்கும் இந்த முயற்சி, செந்தூல் பகுதியில் பெருமளவில் வரவேற்பைப் பெற்றுள்ளது.