
கோலாலம்பூர், நவ19
மலேசியாவில் உள்ள இந்து ஆலயங்களுக்கு வெளிநாட்டுப் பிரமுகர்கள் வருகை தருவதை இந்து சமூகம் எப்போதும் வரவேற்கிறது என உரிமை கட்சித் தலைவர் பி. ராமசாமி எழுப்பியுள்ளார்.
இருப்பினும், ஆலயங்களுக்கு வருகை தருபவர்கள் ஆலயத்திற்குள் நுழைவதற்கு முன்பு தங்களது காலணிகளைக் கழற்ற வேண்டும் என்ற மிக எளிய அடிப்படை விதியைக் கடைப்பிடிக்க வேண்டும்
அண்மையில், பிரான்ஸ் அதிபர் இமானுவேல் மக்ரோன் மற்றும் மலேசியப் பிரதமர் அன்வார் இப்ராஹிம் ஆகியோர் அடங்கிய குழுவினர், பெட்டாலிங் தெரு பகுதியில் உள்ள சில இடங்களுக்குச் சென்றதுடன், அங்குள்ள ஸ்ரீ மகா மாரியம்மன் ஆலயத்திற்கும் வருகை தந்தனர்.
இந்து ஆலயங்களுக்குச் செல்லும்போது கடைப்பிடிக்க வேண்டிய அடிப்படை விதிமுறைகள் குறித்து அந்தக் குழுவினருக்கு முறையாக விளக்கமளிக்கப்பட்டதா என்பது தெரியவில்லை. ஆனால், அவர்கள் காலணிகளைக் கழற்றாமல் ஆலயத்திற்குள் நுழைந்துள்ளனர்.
ஒருவர் இந்து ஆலயத்திற்குள் நுழையும்போது, அவருடைய அரசியல் அல்லது சமூக அந்தஸ்து எதுவாக இருந்தாலும், எளிய அடிப்படை விதிமுறைகளைக் கட்டாயம் கடைப்பிடிக்க வேண்டும்.
ஆலயங்களுக்குள் காலணிகளை அணிந்து செல்லக்கூடாது என்பது இந்துக்களின் மிக அடிப்படையான நம்பிக்கையும் மரபுமாகும்.
2017ஆம் ஆண்டு, நான் பினாங்கு மாநிலத்தின் இரண்டாவது துணை முதலமைச்சராகவும், பினாங்கு இந்து அறவாரியத் தலைவராகவும் (PHEB) இருந்தபோது, அன்றைய வேல்ஸ் இளவரசரும் தற்போதைய மன்னருமான மூன்றாம் சார்லஸ் மற்றும் அவரது துணைவியார் கமீலா ஆகியோர் குயின் ஸ்திரீட்டில் அமைந்துள்ள மகா மாரியம்மன் இந்து ஆலயத்திற்கு வருகை தந்தனர்.
அப்போது அவர்கள் இருவரும் ஆலயத்தின் நுழைவாயிலிலேயே தங்களது காலணிகளைக் கழற்றிவிட்டே ஆலயத்திற்குள் நுழைந்தனர்.
இதற்குக் காரணம், மலேசியாவில் உள்ள இந்து ஆலயங்களுக்குச் செல்லும்போது கடைப்பிடிக்க வேண்டிய விதிமுறைகள் மற்றும் நடைமுறைகள் குறித்து பினாங்கு இந்து அறவாரிய அதிகாரிகள் அவர்களுக்கு முறையாக விளக்கமளித்திருந்ததே ஆகும்.
பெட்டாலிங் தெரு ஆலயத்திற்கு வருகை தந்த குழுவினருக்கு ஏன் முறையாக விளக்கமளிக்கப்படவில்லை என்பதை என்னால் புரிந்துகொள்ள முடியவில்லை.
அனைத்துப் பிரமுகர்களிலும், மலேசியப் பிரதமர் என்ற முறையில் அன்வார் இப்ராஹிம் இந்த நாட்டில் உள்ள இந்து ஆலயங்களுக்குச் செல்லும்போது கடைப்பிடிக்க வேண்டிய மரபுகளை நன்கு அறிந்திருக்க வேண்டும்.
மக்ரோன் மற்றும் பிற வெளிநாட்டுப் பிரமுகர்களின் செயலை ஒருவேளை அறியாமையின் காரணமாகப் பொறுத்துக்கொள்ளலாம். ஆனால், மலேசிய அதிகாரிகளின் செயல்பாட்டை அவ்வாறு ஏற்றுக்கொள்ள முடியாது.
மலேசியாவில் உள்ள இந்துக்களிடம் பிரதமர் அன்வார் மன்னிப்புக் கோர வேண்டும்.
வெளிநாட்டுத் தலைவர்கள் இந்து ஆலயங்களுக்கு வருகை தருவது இதுவே முதல் முறையல்ல. ஆலயங்களுக்குள் காலணிகளுடன் நுழைந்த சம்பவங்கள் மிகச் சிலவே உள்ளன.
இந்துக்களின் வழிபாட்டுத் தலங்களான ஆலயங்களுக்குள் காலணிகளுடன் நுழைவதை எந்த வகையிலும் நியாயப்படுத்த முடியாது.
இந்த நாட்டில் வாழும் இந்தியர்களுக்கு உதவுவதாகப் பேசும் அன்வார், அவர்களின் வழிபாட்டுத் தலங்களுக்கு உரிய மரியாதை அளிப்பதற்குக்கூடத் தயாராக இல்லாதபோது, அவரது பேச்சில் என்ன அர்த்தம் இருக்கிறது?
வெளிநாட்டிலிருந்து வருகை தருபவர்கள் இந்து ஆலயங்களுக்கு உரிய மரியாதை அளிக்கத் தயாராக இல்லையென்றால், குறைந்தபட்சம் அவர்கள் ஆலயங்களுக்கு வருகை தருவதையே தவிர்த்துக்கொள்ள வேண்டும்.
பக்கத்தான் ஹராப்பான் (PH) கூட்டணியில் உள்ள இந்திய ஆதரவாளர்கள், அன்வார் இந்து ஆலயத்திற்குள் காலணிகளுடன் நுழைந்த விவகாரத்தில் எவ்வாறு எதிர்வினையாற்றப் போகிறார்கள் என்பதை அறிய ஆவலாக இருக்கிறேன் என அவர் கூறினார்.


