பெட்டாலிங் ஜெயா, அக 8
2025 டிசம்பர் 31 நிலவரப்படி, மத்திய அரசுக்கு செலுத்த வேண்டிய நிலுவைக் கடன் தொகை RM8.08 பில்லியனாக இருந்ததாக துணை நிதியமைச்சர் லியூ சின் தொங் தெரிவித்தார்.
இதில் அதிகபட்சமாக நிறுவனங்கள் 62% கடன் பாக்கியைக் கொண்டுள்ளன. அதனைத் தொடர்ந்து மாநில அரசுகள் 32% பங்கைக் கொண்டுள்ளன.
இந்தக் கடன் பாக்கிகள் பெரும்பாலும் சுத்தமான குடிநீர் விநியோகம், கழிவுநீர் மேலாண்மை, குறைந்த விலை பொது வீடமைப்பு மற்றும் பொது போக்குவரத்து உள்ளிட்ட அடிப்படை பொது உள்கட்டமைப்புத் திட்டங்களுக்காக வழங்கப்பட்ட கடன்களுடன் தொடர்புடையவை என லியூ தெரிவித்தார்.
நாடாளுமன்றத்தில் கணக்காய்வாளர் நாயகத்தின் அறிக்கை 2/2026 தொடர்பான விவாதத்திற்கு நிதியமைச்சு சார்பில் பதிலளித்தபோது அவர் இதனைத் தெரிவித்தார்.
மொத்த நிலுவையில் RM5.709 பில்லியன் அசல் கடனாகவும், RM2.375 பில்லியன் வட்டி மற்றும் தாமதக் கட்டண வட்டியாகவும் உள்ளது.
கடன் பாக்கி விகிதம் 15.67% ஆக இருப்பதாகவும், 2020 முதல் 2022 வரையிலான சராசரி 21% விகிதத்துடன் ஒப்பிடுகையில் இது குறைந்துள்ளதாகவும் லியூ கூறினார்.
கடன் பெற்றவர்களின் நிதித் திறனை மதிப்பீடு செய்து, தேவையான இடங்களில் கடன் மறுசீரமைப்பு மற்றும் நீண்டகால திருப்பிச் செலுத்தும் கால அவகாசம் வழங்குவதன் மூலம் அவர்களின் கடன் சுமையை குறைக்க அரசாங்கம் நடவடிக்கை எடுத்து வருவதாகவும் அவர் தெரிவித்தார்.
மேலும், கடனை வசூலிப்பதற்கான அனைத்து முயற்சிகளும், சட்ட நடவடிக்கைகள் உட்பட, தோல்வியடைந்த பின்னரே சில சந்தர்ப்பங்களில் கடன் தள்ளுபடி பரிசீலிக்கப்படும் எனவும் அவர் கூறினார்.
குறிப்பாக, மலேசிய நிறுவன ஆணையத்தின் அறிக்கையின் அடிப்படையில் திவாலானவை என உறுதி செய்யப்பட்ட நிறுவனங்களின் வட்டி தொகை மட்டும் குறிப்பிட்ட நிபந்தனைகளின் கீழ் தள்ளுபடி செய்யப்படலாம்.
புதிய கடன்களுக்கு முன் கட்டாயமாக சாத்தியக்கூறு மதிப்பீடு மேற்கொள்ளப்படும் என்றும், கடன் பெறுபவரின் உண்மையான திருப்பிச் செலுத்தும் திறனுக்கு ஏற்ப மட்டுமே கடன் வழங்கப்படும் என்றும் லியூ தெரிவித்தார்.
