சுபாங்: அக் 13
சுபாங் சுல்தான் அப்துல் அஜீஸ் ஷா விமான நிலையத்திலிருந்து (SZB) சரவாக்கின் மிரி, சிபு மற்றும் இந்தோனேசியாவின் பாலி ஆகிய இடங்களுக்கு மூன்று புதிய நேரடி விமானச் சேவைகளை Batik Air அறிமுகப்படுத்தவுள்ளது.
இந்த விரிவாக்கத்தின் மூலம் கிழக்கு மலேசியா மற்றும் சர்வதேசப் பயணத் தலங்களுக்கான சுபாங் விமான நிலையத்தின் இணைப்புகள் மேலும் வலுப்பெறும். கோலாலம்பூர் அனைத்துலக விமான நிலையம் (KLIA) வழியாகப் பயணிக்க வேண்டியவர்களுக்கு, நகருக்கு அருகிலுள்ள சுபாங் விமான நிலையத்திலிருந்து நேரடியாகப் பயணிக்கும் மாற்று வாய்ப்பும் கிடைக்கும்.
டிசம்பர் 1, 2026 முதல், சுபாங்கிலிருந்து மிரி மற்றும் சிபு ஆகிய இடங்களுக்கு வாரத்திற்கு தலா மூன்று விமானச் சேவைகள் இயக்கப்படும். இதன் மூலம் கிள்ளான் பள்ளத்தாக்குப் பகுதி, சரவாக்கின் முக்கிய நகரங்களான மிரி மற்றும் சிபு ஆகியவற்றுடன் நேரடியாக இணைக்கப்படும்.
இதனைத் தொடர்ந்து, டிசம்பர் 2, 2026 முதல் சுபாங்–பாலி நேரடி விமானச் சேவை தொடங்கும். இந்தச் சேவை வாரத்திற்கு நான்கு முறை இயக்கப்படும் என அறிவிக்கப்பட்டுள்ளது.
கிழக்கு மலேசியா மற்றும் சர்வதேசப் பயணங்களுக்கு கூடுதல் வசதி
சுபாங் விமான நிலையத்தை உள்நாட்டு மற்றும் சர்வதேசப் பயணங்களுக்கான முக்கிய நுழைவாயிலாக மேம்படுத்தும் முயற்சியின் ஒரு பகுதியாக இந்த விரிவாக்கம் மேற்கொள்ளப்படுகிறது.
தீபகற்ப மலேசியாவுக்கும் சரவாக்குக்கும் இடையே நிலவும் வலுவான பயண மற்றும் வர்த்தகத் தொடர்புகளைக் கருத்தில் கொண்டு மிரி, சிபு ஆகிய நகரங்களுக்கான சேவைகள் அறிமுகப்படுத்தப்பட்டுள்ளன.
எரிசக்தி மற்றும் சேவைத் துறைகளின் முக்கிய மையமாக விளங்கும் மிரி, வர்த்தகப் பயணிகள் மட்டுமின்றி குடும்பத்தினரைச் சந்திக்கவும் சுற்றுலாவுக்கும் செல்பவர்களையும் ஈர்க்கிறது.
அதேவேளையில், சரவாக்கின் மத்திய பகுதியில் அமைந்துள்ள சிபு, வர்த்தகம், தொழில் மற்றும் குடும்பப் பயணங்களுக்கான முக்கிய மையமாகத் திகழ்கிறது.
சுற்றுலாப் பயணிகளுக்கு பாலி பிரபலமான சர்வதேசத் தேர்வாக உள்ளது. சுமார் 9 மில்லியன் மக்கள் வசிக்கும் கிரேட்டர் கிள்ளான் பள்ளத்தாக்குப் பகுதியைச் சேர்ந்த பயணிகளுக்கு, சுபாங்கிலிருந்து நேரடியாகப் பாலிக்குச் செல்லும் வசதி கூடுதல் பயனளிக்கும்.
இதன் மூலம் விடுமுறைக்காகப் பயணம் செய்பவர்கள் KLIA வரை செல்லாமல் சுபாங்கிலிருந்தே தங்களது பயணத்தைத் தொடங்க முடியும். மேலும், பயணங்களைத் திட்டமிடுவதிலும் அதிக நெகிழ்வுத்தன்மை கிடைக்கும்.
“சுபாங் விமான நிலையத்தின் இணைப்புகளைத் தொடர்ந்து விரிவுபடுத்துவோம்” – Batik Air
Batik Air தலைமைச் செயல் அதிகாரி டத்தோ சந்திரன் ராமா முத்தி கூறுகையில், கிள்ளான் பள்ளத்தாக்குப் பகுதி மக்களுக்கு வசதியான விமானப் பயண நுழைவாயிலாக சுபாங் விமான நிலையம் வளர்வதற்குப் பெரும் வாய்ப்பு இருப்பதாகத் தெரிவித்தார்.
விமான நிலையத்தின் பங்கை மலேசிய விமானப் போக்குவரத்து வலையமைப்பில் மீண்டும் வலுப்படுத்தும் முயற்சிகளுக்கு Batik Air தொடர்ந்து ஆதரவளிக்கும் என்றும் அவர் கூறினார்.
“கிள்ளான் பள்ளத்தாக்கின் எதிர்காலப் பயணச் சேவைகளில் சுபாங் விமான நிலையம் முக்கிய இடத்தைப் பெற்றுள்ளது. விமான நிலையம் தொடர்ந்து வளர்ச்சியடையும் நிலையில், வர்த்தகம், குடும்பம் மற்றும் சுற்றுலாப் பயணங்களுக்கு முக்கியமான இடங்களுடன் நேரடி இணைப்புகளை ஏற்படுத்துவதன் மூலம் பயணிகளுக்கு அதிகத் தேர்வுகளை வழங்க முடியும்,” என்றார்.
மிரி மற்றும் சிபுவுக்கான சேவைகள் கிழக்கு மலேசியாவுடனான இணைப்பை வலுப்படுத்தும் என்றும், பாலிக்கான சேவை சுபாங்கிலிருந்து கிடைக்கும் சர்வதேசப் பயணத் தேர்வுகளை அதிகரிக்கும் என்றும் அவர் குறிப்பிட்டார்.
“சுபாங்கிலிருந்து நேரடியாக இந்த இடங்களுக்குச் செல்லும் வசதியை வழங்குவதன் மூலம் பயணங்களை மேலும் எளிதாக்கவும், KLIA-வில் இருந்து பயணத்தைத் தொடங்குவதற்கான மாற்று வாய்ப்பை வழங்கவும் முடியும் என நம்புகிறோம்,” என்று அவர் தெரிவித்தார்.
மக்களின் பயணத் தேவைகளுக்கு ஏற்ப புதிய வழித்தடங்களை படிப்படியாக உருவாக்கி, சுபாங் விமான நிலையத்தின் வளர்ச்சியைத் தொடர்ந்து ஆதரிப்போம் என்றும் சந்திரன் ராமா முத்தி கூறினார்.
சுபாங்கிலிருந்து ஏற்கெனவே பல இடங்களுக்கு விமானச் சேவைகள்
புதிய மிரி, சிபு மற்றும் பாலி சேவைகளுடன், சுபாங் விமான நிலையத்திலிருந்து Batik Air இயக்கும் வழித்தடங்களின் எண்ணிக்கை மேலும் விரிவடைகிறது.
ஏற்கெனவே பாங்காக், சிங்கப்பூர், ஜகார்த்தா, பினாங்கு, கூச்சிங், கோத்தா கினபாலு, கோத்தா பாரு, ஜொகூர் பாரு மற்றும் லங்காவி உள்ளிட்ட இடங்களுக்கு விமானச் சேவைகள் வழங்கப்படுகின்றன.
இந்த விரிவாக்கம், கிள்ளான் பள்ளத்தாக்குப் பகுதி மக்களுக்கு சுபாங்கை வசதியான விமானப் பயண நுழைவாயிலாக வலுப்படுத்துவதுடன், தீபகற்ப மலேசியா, கிழக்கு மலேசியா மற்றும் பிராந்தியப் பயணத் தலங்களுக்கு இடையிலான இணைப்புகளையும் மேம்படுத்தும்.
மேலதிக தகவல்கள் மற்றும் விமானப் பயணங்களைத் திட்டமிடுவதற்கு Batik Air கைப்பேசிச் செயலியைப் பதிவிறக்கம் செய்யலாம் அல்லது www.batikair.com என்ற இணையதளத்தைப் பார்வையிடலாம்.
