மலேசியாவுக்கு தனது விசுவாசம் குறித்து சந்தேகத்தை ஏற்படுத்தும் வகையில் சமூக ஊடகங்களில் பதிவுகள் வெளியிட்டதாகக் கூறி, கிள்ளான் நாடாளுமன்ற உறுப்பினர் வி. கணபதிராவ், பிரசங்கியார் ஃபிர்தவுஸ் வோங்கிற்கு எதிராக இங்குள்ள உயர் நீதிமன்றத்தில் அவதூறு வழக்குத் தொடர்ந்துள்ளார்.
ஜூலை 28ஆம் தேதி ஃபிர்தவுஸ் வோங்கின் Facebook மற்றும் Instagram கணக்குகளில் வெளியிடப்பட்ட பதிவுகள், தமது நற்பெயர், நேர்மை மற்றும் மக்களால் தேர்ந்தெடுக்கப்பட்ட பிரதிநிதி என்ற நம்பகத்தன்மைக்குக் களங்கம் ஏற்படுத்தியதாக கணபதிராவ் குற்றஞ்சாட்டியுள்ளார்.
இந்தப் பதிவுகள், பிப்ரவரி 8ஆம் தேதி இந்தியப் பிரதமர் நரேந்திர மோடியின் மலேசியப் பயணத்தின்போது அவரை கணபதிராவ் சந்தித்ததைத் தொடர்ந்து வெளியிடப்பட்டதாகக் கூறப்படுகிறது.
வழக்கில் தாக்கல் செய்யப்பட்டுள்ள மனுவின்படி, அந்தச் சந்திப்பின்போது இந்திய வம்சாவளியைச் சேர்ந்த தகுதியுள்ள மலேசியர்கள் இந்தியாவின் வெளிநாட்டு இந்தியக் குடியுரிமை (Overseas Citizenship of India – OCI) வசதியைப் பெறுவதற்கான நிபந்தனைகள் குறித்து மோடியிடம் கணபதிராவ் கவலை தெரிவித்ததுடன், தகுதியானவர்களுக்கு அதிக நெகிழ்வுத்தன்மை வழங்குமாறும் கோரியுள்ளார்.
அந்தக் கோரிக்கையைச் சந்திப்பின்போது கணபதிராவ் ஏன் இவ்வளவு தீவிரமாக முன்வைத்தார் என்ற கேள்வியை ஃபிர்தவுஸ் வோங் எழுப்பியதாகவும் மனுவில் குறிப்பிடப்பட்டுள்ளது.
மேலும், அந்தப் பதிவில் OCI வசதி “Overseas Indian Citizen Card” என்று குறிப்பிடப்பட்டிருந்ததுடன், இறுதியில் “Ganabatirau is loyal to Malaysia” என்ற வாசகமும் வணக்கம் தெரிவிக்கும் முகபாவனையைக் குறிக்கும் எமோஜியுடன் இடம்பெற்றிருந்தது.
இந்த இறுதி வாசகம் தமது மலேசிய விசுவாசத்தை உறுதிப்படுத்தும் நோக்கில் எழுதப்படவில்லை என்றும், மாறாக நையாண்டியாகப் பயன்படுத்தப்பட்டு தமது விசுவாசம் குறித்து சந்தேகத்தை ஏற்படுத்தும் நோக்கத்தைக் கொண்டிருந்ததாகவும் கணபதிராவ் தனது மனுவில் தெரிவித்துள்ளார்.
அந்தப் பதிவை முழுமையாகப் பார்க்கும்போது, மலேசியா மற்றும் இந்தியா ஆகிய இரு நாடுகளுக்கிடையே தமது விசுவாசம் பிரிந்திருப்பதாகவும், மலேசியாவின் நலன்களை விட இந்தியாவின் நலன்களுக்கு முன்னுரிமை அளிப்பதாகவும் வாசகர்களுக்கு ஒரு தோற்றத்தை ஏற்படுத்தியதாக அவர் குற்றஞ்சாட்டியுள்ளார்.
அதேவேளையில், OCI வசதி இந்தியக் குடியுரிமையை வழங்குவதில்லை என்றும், மலேசியர்கள் தங்களது குடியுரிமையையோ மலேசியாவுக்கான விசுவாசத்தையோ கைவிட வேண்டும் என்று தமது ஆரம்பக் கூற்றில் எதுவும் தெரிவிக்கப்படவில்லை என்றும் கணபதிராவ் வலியுறுத்தியுள்ளார்.
வழக்கு மனுவின்படி, ஃபிர்தவுஸ் வோங்கின் Facebook கணக்கில் சுமார் 1.4 லட்சம் பின்தொடர்பவர்களும், Instagram கணக்கில் சுமார் 3.87 லட்சம் பின்தொடர்பவர்களும் உள்ளனர்.
சர்ச்சைக்குரிய Facebook பதிவு சுமார் 963 எதிர்வினைகள், 207 கருத்துகள் மற்றும் 139 பகிர்வுகளைப் பெற்றதாகவும், Instagram பதிவு சுமார் 1,525 விருப்பங்களையும் 163 கருத்துகளையும் பெற்றதாகவும் மனுவில் குறிப்பிடப்பட்டுள்ளது.
ஆகஸ்ட் 4ஆம் தேதி, அந்தப் பதிவுகளைத் திரும்பப் பெறுதல், மன்னிப்புக் கோருதல் மற்றும் அவற்றை நீக்குதல் ஆகியவற்றைக் கோரி ஃபிர்தவுஸ் வோங்கிற்கு சட்டக் கோரிக்கை கடிதம் அனுப்பியதாக கணபதிராவ் தெரிவித்துள்ளார்.
ஆனால், அந்தக் கோரிக்கைகளுக்கு இணங்க ஃபிர்தவுஸ் வோங் மறுத்ததுடன், தமது குற்றச்சாட்டை பொதுவெளியில் தொடர்ந்து ஆதரித்ததாகவும் அவர் கூறியுள்ளார்.
இந்த வழக்கில் கணபதிராவ் பொதுவான இழப்பீடு, கூடுதல் இழப்பீடு மற்றும் தண்டனைக்குரிய இழப்பீடு ஆகியவற்றைக் கோரியுள்ளார். மேலும், இதுபோன்ற பதிவுகள் மீண்டும் வெளியிடப்படுவதைத் தடுக்கும் நீதிமன்ற உத்தரவு, சர்ச்சைக்குரிய பதிவுகளை நீக்குதல் மற்றும் பொதுமன்னிப்பு ஆகியவற்றையும் அவர் கோரியுள்ளார்.
இந்த வழக்கு நேற்று SN Nair & Partners சட்ட நிறுவனத்தின் மூலம் தாக்கல் செய்யப்பட்டது.
