கோலாலம்பூர் , அக் 19
உரிமம் இன்றி வியாபாரம் செய்யும் வெளிநாட்டவர்களுக்கு எதிராக மலேசிய மக்கள் தாங்களாகவே நடவடிக்கை எடுக்க வேண்டாம் என்று பிரதமர் துறையின் (கூட்டரசுப் பிரதேசங்கள்) அமைச்சர் ஹன்னா இயோ எச்சரித்துள்ளார். அவ்வாறு தனிப்பட்ட முறையில் நடவடிக்கை எடுப்பது சட்டவிரோதமானது என்றும் அவர் தெரிவித்தார்.
“மலேசிய குடிமக்களுக்கு எனது அறிவுரை என்னவென்றால், யாரும் தாங்களாகவே நடவடிக்கை எடுக்க வேண்டாம். அது சட்டத்தை மீறும் செயலாகும்.
“உள்ளாட்சி அதிகாரிகளும் தனியாகச் செயல்பட முடியாது. ஏனெனில், அவர்களது அதிகாரங்கள் தங்களுக்குப் பொருந்தும் சட்டங்களால் வரையறுக்கப்பட்டுள்ளன.
“சரியான அரசுத் துறைகள் வந்து தங்களுடைய பொறுப்புகளை நிறைவேற்றுவதை நாம் உறுதிசெய்ய வேண்டும்,” என்று அவர் கூறினார்.
கோலாலம்பூரில் உள்ள தாமான் ஸ்ரீ சினார் தேசியப் பள்ளியில் சிறப்புக் கல்விக்கான பல்புலன் உணர்வு அறையை மேம்படுத்தும் திட்டத்தில் கலந்துகொண்ட பின்னர், இன்று செய்தியாளர்களிடம் அவர் இதனைத் தெரிவித்தார்.
வெளிநாட்டவர்கள் உரிமம் இன்றி வியாபாரம் செய்வது தொடர்ந்து பிரச்சினையாக இருந்து வருவதுடன், சில உள்ளூர் மக்கள் தாங்களாகவே நடவடிக்கை எடுக்கத் தொடங்கியிருப்பது குறித்தும் அவரிடம் கேள்வி எழுப்பப்பட்டது.
ஒருங்கிணைந்த அமலாக்க நடவடிக்கை அவசியம்
வெளிநாட்டவர்கள் தொடர்பான அமலாக்க நடவடிக்கைகளில் குடிநுழைவுத் துறை, சமூக நலத்துறை மற்றும் காவல்துறை ஆகியவை இணைந்து செயல்பட வேண்டும் என்று ஹன்னா இயோ தெரிவித்தார்.
“கூட்டரசுப் பிரதேசத் துறையோ அல்லது உள்ளாட்சி அதிகாரிகளோ, கோலாலம்பூரில் மட்டுமல்ல, மலேசியாவின் அனைத்து இடங்களிலும் தனியாகச் செயல்பட முடியாது.
“கட்டாயமாக ஒருங்கிணைந்த நடவடிக்கைகள் மேற்கொள்ளப்பட வேண்டும்,” என்று அவர் கூறினார்.
இந்த விவகாரம் நாடாளுமன்றத்திலும் அடிக்கடி எழுப்பப்படுவதாகவும் அவர் குறிப்பிட்டார்.
உரிமங்களைத் தவறாகப் பயன்படுத்தினால் ரத்து செய்யப்படும்
செகாம்புட் நாடாளுமன்ற உறுப்பினருமான ஹன்னா இயோ, தகுதியுடைய விண்ணப்பதாரர்களுக்கு வழங்கப்பட்ட வணிக உரிமங்கள் உண்மையில் அவர்களாலேயே பயன்படுத்தப்படுகின்றனவா என்பதை உறுதிப்படுத்த, கோலாலம்பூர் மாநகர மன்றம் (DBKL) தனது உரிமச் சோதனைகளைத் தீவிரப்படுத்த வேண்டும் என்று கேட்டுக்கொண்டுள்ளார்.
“மலேசியக் குடிமகன் ஒருவர் உரிமம் பெற்றுவிட்டு, அதனை வெளிநாட்டவருக்கு உள்வாடகைக்கு வழங்குவது தெரியவந்தால், உள்ளாட்சி அதிகாரிகள் அந்த உரிமத்தை ரத்து செய்வார்கள்,” என்று அவர் தெரிவித்தார்.
மேலும், வீடற்றவர்களுக்கான நடவடிக்கைகளையும் அதிகரிக்குமாறு கேட்டுக்கொண்ட அவர், கூட்டரசுப் பிரதேசத் துறைத் தலைவர்களுடன் நேரடியாகச் சென்று கள நிலவரத்தை ஆய்வு செய்யத் திட்டமிட்டுள்ளதாகவும் கூறினார்.
இந்த விவகாரம் அமைச்சரவைக் கூட்டத்திலும் விவாதிக்கப்பட்டதாகவும், நாடு முழுவதும் ஒருங்கிணைந்த அமலாக்க நடவடிக்கைகளை அதிகரிக்க வேண்டியதன் அவசியம் வலியுறுத்தப்பட்டதாகவும் அவர் தெரிவித்தார்.
அமலாக்க நடவடிக்கைகளில் வெளிப்படைத்தன்மை
அமலாக்க நடவடிக்கைகளின் வெளிப்படைத்தன்மை குறித்து பேசிய ஹன்னா இயோ, DBKL தனது அதிகாரப்பூர்வ ஃபேஸ்புக் பக்கத்தில் அமலாக்க நடவடிக்கைகள் தொடர்பான தகவல்களைத் தொடர்ந்து வெளியிட்டு வருவதாகக் கூறினார்.
மேலும், அடுத்த ஆண்டுக்கான வரவுசெலவுத் திட்டத்தில் DBKL அமலாக்க அதிகாரிகளுக்கு உடலில் அணியும் கேமராக்களை (Body Cameras) வழங்குவதற்கான நிதி ஒதுக்கீடும் சேர்க்கப்பட்டுள்ளதாக அவர் தெரிவித்தார்.
“தற்போது உடலில் அணியும் கேமராக்களின் பயன்பாடு மிகவும் குறைவாகவே உள்ளது.
“எத்தனை கேமராக்கள் வாங்கப்படும், அதற்காக எவ்வளவு நிதி ஒதுக்கப்பட்டுள்ளது போன்ற கூடுதல் விவரங்களை DBKL-இடமிருந்துதான் பெற வேண்டும்,” என்று அவர் கூறினார்.
